ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបញ្ជាក់បន្ថែមលើពាក្យថា ស្រែធំ ប្រើពូជច្រើន ថែទាំបានល្អនឹងទទួលផលច្រើននិងល្អ ទៅនឹងក្រុមគ្រួសារគណបក្សប្រជាជនដែលមានរាប់លានគ្រួសារ។ 

សម្ដេចតេជោ ហ៊ុន សែន បានផុសនៅលើបណ្ដាញសង្គមរបស់សម្ដេចនាយកថ្ងៃទី៦ ខែមករានេះ ជាមួយនឹងរូបថតនៃការជួបជុំគ្រួសារត្រកូលបុណ្យកាលពីថ្ងៃទី២៩ ខែធ្នូ ឆ្នាំ២០២២ ដោយអមនឹងពាក្យថា៖ «ស្រែធំ ប្រើពូជច្រើន ថែទាំបានល្អនឹងទទួលផលច្រើននិងល្អ។ មនុស្សគ្រប់អាយុបោះឆ្នោតម្នាក់ជាសន្លឹកឆ្នោតមួយសន្លឹកសម្រាប់ក្រុមគ្រួសារគណបក្សប្រជាជនរាប់លានគ្រួសារ»។ 

ក្នុងន័យនេះសម្ដេចតេជោមានន័យថាគ្រួសារគណបក្សប្រជាជនរាប់លានគ្រួសារនោះនឹងអាចនាំឲ្យគណបក្សប្រជាជនទទួលបានសំឡេងឆ្នោតរាប់លានសន្លឹកដូចគ្នា។

ការបោះឆ្នោតជ្រើសតាំងតំណាងរាស្ត្រអាណត្តិទី៧ ឆ្នាំ២០២៣ និងខិតចូលមកដល់នៅថ្ងៃទី២៣ ខែកក្កដា ឆ្នាំ២០២៣ ខាងមុខ៕